طارق الشناوي عن محمد منير: «مبيعرفش يمثل»

تحدث الناقد الفني طارق الشناوي بصراحة معبرًا عن رأيه في تمثيل الفنان محمد منير في مسلسله الرمضاني الجديد «المغني»، مشيرا إلى أن منير ليست لديه الموهبة للتمثيل رغم تميزه في الغناء.

وقال «الشناوي»: «افكرة إن اسم الممثل ينجح أعماله الدرامية أم لا، دي تسمى ضربة البداية هي إن أنت يكون معاك فلان معاك عادل إمام أو محمد منير أو يحيى الفخراني علشان تنجح العمل، لكن ضربة البداية ممكن يبقى لها إنعكاس سلبي، لأن أنت طالما عندك توقع كبير فطبعًا لازم يبقى العمل قد التوقع لكن في الحقيقة بيكون دون التوقع».

وتابع: «أنا رأيي إن محمد منير بقاله مدة بيفكر بس اتاخر، ربما هو جوه عايز يقفل أو يقول حاجه في حياته، لكن ربنا يديله العمر والصحة ومنير لسة قدامه كثير، لكن ساعات بتبقى عايز تقول أنا أساوي كذا وكذا وده الخطأ اللي وقع فيه العمل الدرامي بتاع منير، لأن هو مكتوب من خلال عقل ورؤية منير، يعني بالتأكيد الأثنين الجدد اللي في المسلسل اللي أنا مش فاكر أسمائهم قعدوا معاه وهو قالهم أنا عايز أقول كذا».

واستكمل: «في فرق بين إنك تقدم شخصية درامية وإنك تقدم نفسك، يعني مثلًا زي عادل إمام عايز يقدم شخصية بخيل فبيقدم في مسلسله شخصية مأمون دي أفهمها، لكن منير هو المغني في مسلسله فهو كده بيقدم نفسه، أنا شوفت أول حلقتين واللي لاحظته هو إنه بيتكلم عن نفسه في إنه طيب جدًا وبيحافظ على وقت البروفة، وممكن يبقى منير فيه الصفات الجميلة دي».

واستطرد: «واحد زي حلاتي وكثير بيحبوا يسمعوا أغاني منير لكن لو أنت عايز تتفرج على تمثيل، الراجل مبيعرفش يمثل، منير صديق عزيز واشتغل مع مخرجين زي يوسف شاهين وخيري بشارة لكن في ناس اتخلقت تمثل حلو، وده لا يعيبه، يعني كان محمد عبدالوهاب مبيعرفش يمثل كمان».