الحل الأمثل لمشكلة الإنتفاخ

ناس كتير بتعانى من مشكلة اللإنتفاخ بالذات بعد الأكل مباشرة وده بيكون سبب فى عدم الشعور بالراحة ويؤثر أيضا على المظهر العام. كل خبراء التغذية أجمعوا على أن الإنتفاخ ممكن التخلص منه بمنتهى السهولة بتغيير النظام الغذائى لمدة أسبوعين فقط, وتغيير بعض العادات الغذائية للأبد من أجل هضم و صحة أفضل, وتحسين عملية الهضم فى حد ذاته عامل مهم جدا لخفض الوزن. وأسباب الإنتفاخ ممكن تكون طبية نتيجة مشاكل فى القلب والكبد وممكن تكون بسبب زيادة نسبة الغازات فى المعدة والأمعاء بسبب سوء الهضم وده الى يهمنا فى المقالة دى.

1- تجنب مسببات الإمساك

نقص السوائل والألياف فى الجسم يؤدى الى الإمساك واللى بيأدى بدوره للإنتفاخ, ولتجنب الإنسان المفروض النظام الغذائى يحتوى على 25 ل 35 جرام من الألياف من مصادرها المختلفة كالحبوب الكاملة والخضروات والمكسرات. وطبعا مهم جدا شرب كمية كافية من السوائل, على الأقل لترين من الماء يوميا مع ممارسة الرياضة يوميا لمدة نصف ساعة حتى لو مشى أو تمارين بسيطة.

من الأغذية الغنية بالألياف الفول الأخضر, الخرشوف, البروكلى, البسلة والقمح والشوفان.

2- متاكلش بسرعة

أغلب حالات الانتفاخ وسوء الهضم سببها السرعة فى الأكل, ودى من العادات الغذائية اللى لازم نغيرها للأبد, لو انت من النوع اللى بياكل بسرعة جدا لازم تعود نفسك على الأكل ببطء ومضغ الطعام جيدا لأن الأكل بسرعة غير انه من أهم أسباب سوء الهضم, هو كمان سبب رئبسى لزيادة الوزن. المعدل الطبيعى ان الوجبة تاخد نصف ساعة, لأن عملية الهضم بتبدأ فى الفم قبل المعدة علشان كده مهم أوى مضغ الطعام جيدا قبل بلعه, ومن مزايا الأكل ببطء ان الانسان بيستمتع أكتر بالأكل وكمان بياكل كمية أقل واللى بيؤدى بدوره لخفض الوزن علاوة على حل مشكلة الإنتفاخ. أما السرعة فى الأكل بتسبب فى ان الأكل يأخذ وقت أطول فى الهضم ويفرز غازات أكتر تسبب سوء الهضم والإنتفاخ.

3- غير نظامك الغذائى مؤقتا

لمدة أسبوعين تجنب أكل السكريات والوجبات السريعة و المخبوزات التى تحتوى على خميرة ومنها الخبز, ممكن نستبدل الخبز بالحبوب كالأرز المسلوق مثلا أو القمح والشوفان أو نستهلك مخبوزات بدون خميرة. وطبعا نبتعد تماما عن المخلل والخل بأنواعه وكل الفواكه ما عدا التفاح الأخضر  و نحد من استهلاك منتجات الألبان ويكون أساس الوجبات السمك المشوى والدجاج و الخضروات الطازجة. ومن الممكن اكل الفواكه المجففة وشرب العصائر الفريش مرتين أسبوعيا. الإلتزام بالنظام الغذائى ده هيساهم بشكل كبير فى حل مشكلة الانتفاخ وسوء الهضم وبعد اسبوعين ممكن العودة للأكل المعتاد بشرط تغيير بعض العادات الغذائبة كالسرعة فى الاكل وعدم الإنتظام فى مواعيد الوجبات.

طبعا الوقاية خير من العلاج, و من الأفضل اتباع تظام غذائى متوازن ويحتوى على كافة العناصر الأساسية اللى الجسم محتاجها طول الوقت مع الانتظام فى ممارسة الرياضة على الأقل 3 مرات أسبوعيا وأتمنى لكم تمام الصحة والعافية والاستمتاع.