مي عز الدين تتحدى نفسها على MBC مصر 2

كشفت الفنانة مي عز الدين عن تحملها مسؤلية الترويج لقناة MBC مصر 2 والتي تعرض مسلسلها الرمضاني الجديد "وعد".

وكتبت مي عبر حسابها علي موقع التواصل الاجتماعي فيس بوك: "طيب أنا قضيت اليومين اللي فاتو بحاول أطالب إدارة قنوات Mbc مصر بزيادة إعادات المسلسل وعرضه علي قناة Mbc مصر كمان لأنه بيتعرض علي Mbc مصر 2 فقط ودي ناس كتير مكانتش تعرفها ولا منزلاها وهو المسلسل الوحيد اللي من إنتاج شركة تابعة ليهم ومع ذلك مش راضيين يخلوه يتعرض علي القناتين بتوع Mbc مصر وسايبينه علي Mbc مصر 2 بس. وفي الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف !!! يعني انا كده مطلوب مني أقوم قناة لوحدي !!!".

وتابعت: "تمام وانا بقول لـ mbc قبلت المسؤلية وبإذن الله ربنا يكرم والقناة والمسلسل يتشافو والحمدلله فيه علامات باينة من كم الإعلانات اللي جه من بعد اول حلقة للمسلسل وغيره وانا هعتبره إمتحان ليا يعرفني قدري عند الناس وهل فعلا بيحبو مسلسلاتي أو لا ونسبة الجماهيرية اللي وصلتها ايه مع اني مهما كان ليا جمهور اكيد كنت اتمني اني اتشاف من الناس اللي مش من جمهوري لأن ساعات بتكون كا مشاهد ملكش في ممثل لكن لو قابلت حلقة لمسلسله بالصدفه وعجبتك بتقرر تتابعه وده في الاخر بيبقي خلاني كسبت مشاهد جديد بقي بيحب يتفرج علي اعمالي وده طبعا مش هيحصل السنة دي لأن مفيش حد بيبقي معدي وبيشوف القناه دي بالصدفة الناس لسه اصلا بتتعرف علي طريقها من خلالنا و بينزلوها".

واستكملت: "قدر الله وما شاء فعل وبالتالي عندي طلبين اولا بطلب من جمهوري وروابط الفانز بتاعتي تساعدني في نشر تردد القناه لكل الناس اللي مش عارفة تجيبها وبطلب من صحافتنا تشهد انا بدأت رمضان بقناة كم الناس اللي عارفها قد ايه وصفحتها حتي علي الفيسبوك فيها كام وبعد رمضان تقولولي بأمانة هل قدرت فعلا في ظل الظروف دي أنجح ولا لأ . ومتابعة نسبة مشاهدة القناة علي اخر رمضان هتكون وصلت لأيه ومشاهدة المسلسل علي موقع شاهد دوت نت وصلت لأيه لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة والجمهور ساعتها تعويض يكفيني".